Chronik

So, nu sünd wi ook in´t Internet und hebbt een eeg´n Website, wer hal sick dat vör söben Johr dach, dat wi mal sowiet keem´n.

Eegentlich´s güng dat dormit los, dat een vun uns sik een Stück vun een anner Theotergrupp ansehn hett, und dorbi wohl dacht hett, dat wi dat ook kunnen.

               

Tja, und denn füng he an, bi uns rüm to preestern, dat wi sowat doch ook mal maaken schull´n. So keem dat, dat wi uns an den 25. in Februarmonat 1997 dropen deen. Dat weer in de „Oole School“ vun de Gemeende Rodenbek. Dor hebbt wi denn een Gründungsversammlung afholen. Toerst nömen wi uns „De Speellüdd vun de Eiderschweiz“. Uns Anlengen wär, dat uns plattdütsche Spraak wedder mehr in Mod keem, und de Gemeinschaft und dat tohoop hukken in uns Dörp een beeten mehr in Gang to bringen.

 

Bi de Gründungversammlung wär´n 8 Lüüd direktemang dorbi und 4 Mitglieder kunn nich dorbi sien, wiel dat se verhinnert weern. Schon op de nächste Versammlung, an 13. April in´t glike Johr, hal´n wi all 15 People an Bord und ook de Naam von de Grupp wör ännert. Vun nu an wull´n wi uns „De Theoterlüüd vun Rodenbek“ schimpen.

 

As nu dat förmliche regelt wär, dor güng dat erstmool los mit dat Utsöken vun´t Stück, dat wi speelen wull´n. Denn nich all vun de 15 Lüüd wull´n ook op de Bühn. So hebbt wi denn dat Stück "Een Buddel för Anna" utsöcht, een Eenakter. Mit de Provden füng wi in Harst 97 an. 6 Schauspeeler mössen dorför op de Bühn. De annern hebbt dorbi holpen, een Bühn optobuen, so richti mit Kulisse und Requisite.

 

Een Wort to uns Bühn, de is, neben uns Speellüüd, uns ganze Stolt. Dank de ganzen Handwerker´s, (Discher, Schniederin) de bi uns mitmaakt, sogar een richtigen Bühnenprofi hebbt wi dorbi, kunn´n wi dor wat torecht kriegen, worüm uns so mannigeen beneid´t. Ook de Lichttechnik und dat Bühnenbild, sowie de Vorhang dreegt jedesmool to een gelungene Opführung mit bi. Wi weern uns vun Anfang an eens, ohn een Speelleiter oder een Regisseur uttokaam´n. Vun´t Utsöken vun dat Stück öbert Proven bit hin to Opführung und de Organisation ward alln´s tosomen utklamüstert. Dat hett bit dorto fein klappt, und dat ward ook so wieder maakt.

 

Denn keem de erste Opführung in Febr. 1998. De Opregung wär bannig groot. Aber alln´s hett prima klappt, de Lüüd wär´n begeistert, und wi kreegen heel goode Kritiken, so dat wi uns seggt hebbt, so schlecht künnt wi jo gorni sien, laat uns man wieder maaken. So hebbt wi denn all in´t 2. Johr een Dreeakter instudiert, de eendreeviertel tünn lang wär. Düssen Raahmen hebbt wi bit hüt bibehol´n.

 

Too´d 50. jährige Bestehen vun uns Gemeend hett man uns denn frag´t, op wi opstahn´s nich för dat Fest een Stück speelen kunn, und dor hebbt wi natürlich gliks toseggt, wiel wi vun uns Gemeend ook jümmers bestens unterstützt ward. In de Vergangenheit hebbt wi jümmer´s een paar „öffentliche Proben“ för uns Toschauers maakt und de Hauptopführung is jümmers tosomen mit een Ball veranstalt wor´n. Dat weer bit to de Saison 2003 so. Düt Johr maakt wi dat anners. Dor ward een Generalproof maakt, und för de anner´n Opführungen nehm´t wi Intritt. Und een Ball maakt wi dütt Johr ok ni, wat ni heeten schall, dat dat nächst Johr nich wedder een giv´t.

 

Faaken hett dat de Lüüd so good gefall´n, dat wi all mehrere Gastspeele in annere Gemeenden geben hebbt, Tendenz na boben. Siet dat Johr 2001 hebbt wi sogar een Festutschuß, de noch annere Aktivitäten, allerdings nur för de Theodergrupp, organisieren deit.

 

Op Grund vun de goode Mischung vun uns Theotergrupp, und immer mal wesselnde Besetzung vun de Speelers is uns dat noch ni över worr´n, plattdütsche Stücke to speel´n, und wi wüllt hoffen, dat dat ook in de Tokunft so bliv´t. In´t Johr 2004 hebbt wi 23 Mitstrieders in uns Theotergrupp. So, und nu künnt ji ju noch ankieken, wat wi all alln´s speelt hebbt.

 
   

De Internetsied is in Ümbu.

De Chronik geit noch wieder... dorför bruken wi ´n beten mehr Tiet!

seit 1997

ist viel passiert!

Kieler Nachrichten online 03.02.2017

Kieler Nachrichten vom 04.02.2017 

Michael Fock 1.Vorsitzender

" Kiek mol wedder in"

Druckversion Druckversion | Sitemap
© Michael Fock